Inlawlawag ni Cristina Arsing Sanio, Health Program Coordinator ti rabies, deworming, ken care of respiratory infection ken diarrheal disease program iti Benguet Provincial Health Office kadagiti umili iti Probinsya ti Benguet nga awan pay ti maipasdek nga Animal Bite Treatment Center kadagiti munsipyo iti probinsya gapu iti kinakurang ti pondo ken personnel a mabalin a mangtaming kadagiti biktima ti animal bites.
Iti panakiuman ti Bombo Radyo kenni Sanio, innem laeng a munisipyo manipud kadagiti sangapulo ket tallo a munisipyo ti addaan kadagiti Animal Bite Treatment Centers.
Daytoy ket pakairamanan ti Atok District Hospital idiay Atok, Dennis Molintas District Hospital idiay Bokod, Northern Benguet District Hospital idiay Bekes, Boyacaoan, Buguias, Rural Health Unit idiay Loo, Buguias, BHS-Ucab idiay Itogon, Kapangan District hospital idiay Kapangan, Rural Health Unit idiay Puguis, La Trinidad, ken ti Benguet General Hospital idiay Pico, La Trinidad.
Dagiti met munisipyo nga awanan paylaeng kadagiti Animal Bite treatment centers ket pakairamanan dagiti munisipyo ti Bakun, Kabayan,Kibungan, Mankayan, Sablan, Tuba, ken Tublay.
Gapu iti dayta, kidkiddawen ni Sanio kadagiti nagduduma nga opisyales kadagiti nadakamat a munisipyo ti pangilatangda iti pondo para iti panakaibangon ti animal bite centers kadagiti munisipyo nga awanan pay iti nadakamat a pasalidad.
Malaksid iti dayta, innayon ni Sanio a nupay adda iti umdas a pondo dagiti sumagmamano a munisipyo iti probinsya ti Benguet para iti panakaaramid ti Animal Bite Treatment Centers, inlawlawagna a gapu iti kinakurang ti personnel a mabalin a mangimanihar iti nasao a treatment center, saanna pay a mabalin nga aprubaran ti request dagitoy.//Bombo Genzel Depayso
