Dumanon iti sangapulo ket dua nga ubbing ti agdama nga adda iti Bahay Pag-asa iti siudad ti Baguio.
Iti panakiuman ti Bombo Rayo kenni Florecita Tul-an, Social Welfare Officer iti siudad ken dadaulo ti Bahay Pag-asa, inlawlawagna a ti Bahay Pag-asa ket maysa a pasilidad a kaiturturongan dagiti ubbing nga agtawen iti sangapulo ket walo pababa agingga sangapulo ket lima a naglabsing iti linteg.
Sigun kenni Tul-an, lallaki dagiti adda iti kustodiya dagitoy no sadino ti kasoda ket pakairamanan ti frustrated murder, statutory rape, panagtakaw ken daduma pay.
Kinuna ti social welfare officer a dagiti karit a mapaspasaran dagitoy iti Bahay Pag-asa ket ti kurang a partisipasyon ken kooperasyon dagiti parentes kadakuada no sadino sumagmamano kadagiti nagannak ti saan nga agbisbisita kadagiti anakda a mabalin nga agpababa iti morale dagitoy nangruna no makitkitada a dagiti daduma ket adda agbisbisita kadakuada.
Iti sabali a bangir, imbinglay ni Tul-an a kagiddan ti panakarekober dagiti ubbing ket ragsak ti mariknada kas nagserbi a maikadua a nagannak dagitoy.
Inyunay-unayna met nga iti laksid dagiti naaramidan dagiti ubbing ket nasken ti panakaipaay ti atensyon ken second chancce kadakuada tapno agbaliw ken agbalinda nga asset iti pamilyada kasta met iti pagilian.
