Kinumpirmar dagiti maseknan nga otoridad a dumanunen iti siam dagiti pimmusay iti narba a pasdek idiay Barangay Balibago, Angeles City, Pampanga.
Sigun iti Angeles City Information Office, nailista ti kaudian a datos kalpasan narekober ti bangkay ti maysa a lalaki.
Maipasidong iti verification process ti bangkay tapno maamuan ti pakabigbigan daytoy.
Maipalagip nga immuna a nasarakan dagiti innem a bangkay dagiti sumagmamano a biktima.
Daytoy ket pakairamanan ti construction workers a da Roberto Sabile, 51, ken ti anakna a ni Christian Sabile, 26.
Karaman metlaeng kadagiti nabigbig a biktima dagiti construction workers a da Mark Laurence Capungay, 21; Porperio Alikaway, 66 ken ti Malaysian national a ni Mond Reza Abdullah, 65 nga agnanaed iti maysa a hotel a naapetaran iti narba a pasdek.
Dadduma ket saan paylaeng a nabigbig.
Sigun iti maseknan a city government, agtultuloy ti panangipaayda iti tulong ken suporta kadagiti pamilia a naapektaran iti nasao nga insidente.
Malaksid iti dayta, situtulok ti makinkukua iti pasdek a tumulong kadagiti biktima ken ikagkagumaanna ti mangisayangkat iti kanayunan nga imbestigasyon iti pasamak nga insidente.
