BAGUIO CITY – Pagparparikutan ita ti lokal a gobyerno ti Itogon, Benguet ti kinakurang dagiti contact tracers a mangisayangkat ti contact tracing kadagiti indibidual a nakapulapol dagiti kabarbaru a kaso iti COVID-19 a nailista ti munisipyo sadiay.
Iti panakiyuman ti Bombo Radyo Baguio, kinuna ni Mayor Victorio Palangdan a daytoy ket gapu iti kaadu dagiti nagpositibo sadiay iti coronavirus kas resulta ti mass testing.
Maipalagip nga idi kalman ket 149 ti nagpositibo sadiay Itogon manipud iti 974 a naipasidong iti mass testing ken kaaduan ket empleyado ti Benguet Corporation, dagiti minero ken dagiti kapamilya dagitoy.
Sigun kenkuana, 11 laeng ti contact tracers nga impatulod ti DILG para iti Itogon a katulongan dagiti siguden a contact tracers ti munisipyo.
Dinakamatna nga ikagkagumaanda met a makikoordinar iti DILG para iti panakanayon dagiti contact tracers a maipatulod iti ili.
Kabayatanna, inaklon pay ni Mayor Palangdan nga agkurkurang ti isolation facilities ti Itogon isut gapuna a nagpatulongdan iti Department of Health.
Naipasidong metten iti granular lockdown ti Barangay Ampucao, Barangay Virac ken Barangay Poblacion gapu iti nangato a kaso dagitoy iti COVID-19.
