“For almost a decade na nagtrabaho ako sa Pilipinas at bilang breadwinner ay hindi sapat” ti nagbalin a rason ni Randy Pacay para iti panagturong idiay South Korea kas maysa nga Overseas Filipino Worker wenno OFW.
Iti panakiuman ti Bombo Radyo kenni Pacay, imbinglayna a tawen 2020 idi balligi a nagtrabaho daytoy kas maysa a factory worker idiay South Korea gapu ta tawen 2015 a panggepna nga agtrabaho iti daytoy a pagilian nu pay kasta saan a dagus a natungpal gapu kadagiti personal a banag a rumbeng nga asikasoenna.
Sigun kenni Pacay, kas maysa a promoter dagiti malls ken promo dicer iti pagilian idi ket saan nga umdas ti pangpanggedanna a mausar para kadagiti nagduduma a pagkasapulan ken kadagiti bills a mabayadan.
Impeksana a gapu iti kinarigat ti biyag, ti saan a panangan a nasayaat, ti panagpandesal ken panagkape iti agsapa, ti panangan laeng iti inapoy nu aldaw ken malem ken ti panagtipid kadagiti taraon ti nagbalin a motibasyonna kasta met a nangriing kenkuana a rumbeng a saan daytoy a marikna ti anakna nangruna ket single father daytoy.
Iti panagturong ni Pacay idiay South Korea ket baonna ti tarigagayna a saan a marikna ti sumaruno a henerasyon kasta met ti pamilya daytoy ti kinarigat a napadasanna.
Panggepna nga agbalin a “financially stable” ti pamilyana ken tapnu masukatan ti standard ti panagbiagda.
Kinuna ni Pacay a kayatna met ti makaadal ken makaturpos ngem gapu iti kinapanglaw ti biyag ket saan daytoy a natungpal.
Imbinglay ni Pacay a saan met a nalalaka ti panagturong idiay South Korea agsipud ta kasapulan pay ti panagadal iti lengguwaheda kasta met a ti employer ti agdesisyon nu maala ti maysa nga indibidual kas OFW.
Nu pay kasta, “worth it” ti maala kas maysa nga OFW gpau ta kinuna ni Pacay a saan a mailibak a dakdakkel ti sueldo nu idilig iti pagilian a Pilipinas ken libre ti accommodation dagitoy.
Nalaka met a naka-adjust ni Pacay iti nasao a pagilian gapu ta sigud a fans daytoy kaditi k-drama ken k-pop songs.
Kabayatanna, kinuna ni Pacay a ti maysa a karit iti panagbalin kas OFW ket ti panagsangom a maymaysa kadagiti pannubok iti biyag kas iti panagsakit, panakarikna iti homesick ken daduma pay.
Ngem, para iti pamilya, impeksana a nasken ti panagbalin a natibker ken ti panagkamang iti Apo a namarsua wenno panagkararag nu panawen dagiti pannubok.//Bombo Mera Pacpacan
