Nakaruaren iti ospital ti kaunaan a lalaki iti lubong a nakaawat ti genetically modified kidney transplant manipud iti baboy, dua a lawas kalpasan ti ground breaking surgery daytoy iti Massachusetts General Hospital (MGH).
Isuna ket ni Richard “Rick” Slayman, 62-anyos manipud Weymouth, Massachusetts.
Maibasar iti press release nga imbinglay ti MGH, nagsagaba ti pasyente ti last stage ti kidney disease rason a kinasapulanna ti organ transplant.
Balligi nga inyalis dagiti doktor ti genetically-edited pig kidney iti bagi ti pasyente iti uneg ti uppat nga oras a surgery idi Marso 16.
Sigun kadagiti doktor, nasayaat ti panagfunction ti kidney ti pasyente ken saanen a nasken nga agpa-dialysis daytoy.
Maipalagip a kadagiti napalpalabas ket adda dagiti pasyente a naipasidong iti organ transplant manipud iti genetically modified baboy ngem saan daytoy a naballigi.
Gapu iti daytoy, ado a siyentipiko ti nangdayaw iti naballigi nga operasyon ni Slayman nu sadino imbilangda daytoy kas maysa a pakasaritaan iti tay-ak ti transplantation.
“I’m excited to resume spending time with my family, friends, and loved ones free from the burden of dialysis that has affected my quality of life for many years.” – Slayman
