Inbilin ti Department of Labor and Employment (DOLE) iti makinkukua ken kontraktor iti nag-collapse a building idiay Angeles, Pampanga nga agbayad daytoy iti pakabuklan a P11.7 million kas labor-related liabilities ken administrative fines.
Sigun iti naisayangkat nga imbestigasyon dagiti ahensya, napaneknekan a da Jackson Lim ken Golden Years Construction and Steekworks Corporation ket naglabsing iti labor standards violations nga addan multa a dumanon iti P1.1 milyon.
Malaksid iti dayta, linabsingda metlaeng ti occupational safety and health standards no sadinno addan met daytoy iti multa a dumanon iti P11.7 million.
Naduktalan metlaeng iti imbestigasyon a nagtuloy latta ti trabaho iti nasao a building uray no adda ti naipaulog a work stoppage order manipud DOLE gapu iti delikado a kondisyon ti nasao a lugar.
Naduktalan metlaeng ti nasao nga ahensya ti pananglabsing ti kontraktor kadagiti labor standards kas iti saan a panagbayad iti sweldo ken satutory benefits, underpayment, ken saan nga usto a panangpasweldo tunggal rest days, Sabado, ken holidays.
Peke metlaeng ti insumitir ti nasao a kompanya a sertipiko iti safety officer da.
Maipalagip a nagcollapse ti nasao a building idi Mayo 24 no sadinno dumanon iti agarup 20 a construction workers ti pimmusay. //bombokaren.c.sapirao
