BAGUIO CITY – Tutukan latta ti Benguet Police Provincial Office (PPO) dagiti krimen a kadawyan a mapaspasamak tunggal dumteng ti holiday season ken ti insurhensia.
Sigun kenni Benguet PPO Provincial Director PCol. Elmer Ragay, kadawyan nga adda ti mapaspasamak a krimen tunggal holiday season gaputa adda dagiti indibidual a manggungundaway iti panakakumikom dagiti tattao.
Innayonna nga uray nalatak ti Benguet a maysa kadagiti naulimek ken natalged a probinsya ket saanda latta nga agpakampante tapnu saanda a malusutan dagiti managgundaway a kriminal.
Dinakamatna pay a tutukanda met ti isyu iti insurhensya gaputa adda latta dagiti grupo dagiti rebelde a mabalin a mangisaknap ti riribuk ken panagraut.
Nupay kasta, pagyamyamananna nga awan kadagiti barangay iti Benguet ti addaan presensia wenno bileg dagiti rebelde babaen iti agtultuloy a koordinasyon ken panakitinnulong dagiti komunidad ken dagiti lokal a gobyerno kadagiti otoridad tapnu maparmeken ti panagrebelde iti probinsia.
Sigun pay kenni Col. Ragay, maituloy latta ti nainget a panagbantay kadagiti border checkpoints ken boarder lines ti Benguet kabayatan ti holiday season.
Tarigagay ti sibubukel a pwersa ti Benguet PPO a maipanamnama ti linak ken kappia kabayatan ti panakarambak ti Paskua ken iti panakapasangbay ti Baro a Tawen.
