BAGUIO CITY – Agpatpataming ita iti pagagasan ti maysa a lalaki a biktima ti napasamak a pammaltog sadiay Sitio, Bitu, Brgy Tawangan, Kabayan, Benguet idi kalman.
Nabigbig daytoy a ni Paul Pigudo Guay, 42-anyos ken resident ti Bitu, Tawangan, Kabayan, Benguet.
Nabigbig met ti suspek a ni Dencio Alhida Litawen, 33 anyos, maysa a mannalon ken residente ti Eheb, Tinoc,Ifugao.
Maibasar iti inisyal nga imbestigasyon, adda ti biktima iti uneg ti pagtaengan dagitoy idi killaat a simmangpet ti suspek ken ditoynan a pinaltogan ti biktima ken dagus a timmaray babaen ti motorsiklo.
Nagsagrap ti biktima iti tama ti paltog iti kannigid a paset ti barukong daytoy ken dagus a naiturong sadiay Tinoc District Hospital.
Naamoan pay iti inisyal nga imbestigasyon nga apa iti daga ti rason ti pannakapasamak ti nasao nga insidente.
Dagus met a nangisayangkat iti operasyon dagiti otoridad a nagresulta iti pannakatiliw ti suspek ken naiturong iti kustodiya ti kapulisan.
Narekober met iti crime scene ti maysa nga improvised Cal .22 magnum, maysa nga magazine, 8 nga bala ken maysa nga empty bullet case box.
