--Ads--
BAGUIO CITY – Pimmusay ti maysa a lalaki kalpasan a napaltogan sadiay Macray, Bangued, Abra idi kanikadua.
Nabigbig daytoy a ni Glenly Molina Barbosa, 27-anyos ken residente iti nasao a lugar.
Maibasar iti inisyal nga imbestigasyon ti Bangued MPS, agmanmaneho iti tricycle ti biktima idi bimmatog dagiti saan pay laeng a nabigbig a riding-in-tandem.
Pinaltoganda ti biktima iti namindua a daras a nagresulta iti panakatama ti bukot daytoy.
Naitaray pay iti ospital ti biktima ngem pimmusay met laeng daytoy.
Narekober iti crime scene ti dua a basyo ti bala ti caliber 45 ken agtultuloy ti imbestigasyon dagiti pulis iti motibo ti krimen ken iti pakabigbigan dagiti suspek.
