Saan a ninamnama ni KJ Natuplag, World Boxing Council Oriental and Asian Featherweight Champion nga agballigi daytoy kontra kenni Jensak Phosri iti Super Featherweight match idiay Pattaya, Thailand bayat laeng iti maikadua a round babaen iti body shot knockout.
Iti panakiuman ti Bombo Radyo kenni Natuplag, naaddaan pay iti last minute changes ti nakisalipanna nu sadino, nasukatan ti kinalabanna.
Sigun kenni Natuplag, saan a ti insaganaanna a makalaban manipod France ti nakabalubalna gapu ta naaddaan daytoy iti dunor ken saanen a nakapagtuloy.
Inladawan ni Natuplag nga agrigna “bahala ni batman” ti napasamak gapu iti panakasukat iti nakalabanna iti last minute.
Nagbanag metlaeng nga awan ti napasamak nga scoutingda iti istilo ni Jensak Phosri gapu ta ni Enzo Pétricig manipod France ti immunan nga in-scout dagitoy.
Iti baet dayta, imbinglay ti boksingero a nagbalin a diskartena ken ti coach daytoy a tamaan ti bagi ti kalaban, banag a nakatulong iti panagballigida.
Kabayatanna,nagbalin met a karit kenni Natuplag ti panagkissay iti timbang daytoy gapu metlaeng iti nabayag a saan nga aktibo daytoy a nakilablaban.
Nupay kasta, silulukat latta ti boksingero a tubo iti probinsya iti Ifugao a makisalip para iti regional belt kadagiti sumarsaruno pay a bulan.//Bombo Rob Dominguez
