BAGUIO CITY – Natiliw ti armado a lider ti maysa nga agdindinamag a drug group ken ti dua pay a kakadwana iti naisayangkat a buy-bust operation sadiay Tagadi, Tadiangan, Tuba, Benguet idi rabii.
Nabigbig daytoy a ni Ricardo Manuson alya s Bryan, lider ti Manuson Drug Group ken maysa a High Value Target bayat a nabigbig dagiti kakadwana a da Richie Lomibao Sison ken John Derik Damoco.
Natiliw dagiti tallo kalpasan nga inlakoda ti siyam a pakete ti maatap a shabu nga agdagsen ti nasurok lima a gramo iti nakatransaksionda nga operatiba.
Nakumpiskar pay kadagitoy ti maysa a vial a naglaon ti maatap a liquid meth, maysa a caliber 38 revolver, nagduduma a drug paraphernalia ken ti cellphone nga inaramatda iti transaksion.
Narekober metlaeng iti ikotda ti naaramat a boodle money.
Kabayatanna, natiliw ti maysa a high value drug personality iti sabali pay a buy-bust operation sadiay La Trinidad, Benguet idi kalman.
Nabigbig daytoy a ni George Tullay Chokowen alyas Jethro, 45-anyos, meat vendor ken residente ti Shamolog, Central Pico, La Trinidad, Benguet.
Nakumpiskar kenkuana ti maysa a pakete ti shabu nga agdagsen ti 0.7 gram, maysa a cellphone ken ti nausar a boodle money iti nasao a transaksyon.
Iti agdama, sumangsango dagiti uppat iti kaso a panaglabsing iti RA 9165 wenno Comprehensive Dangerous Drugs Act of 2002.
