--Ads--
BAGUIO CITY – Maipaspasidong ita iti intervention ti DSWD ti uppat a menor de edad kalpasan a naaktuwan dagitoy a nakaimet ti iligal a droga sadiay Ibaloi Park, Burnham-Legarda Brgy, Baguio City itay kanikadua.
Agpatpatrolya dagiti personnel ti Tourist Police Unit (TPU) idi naimatangan da ti komosyon iti nagbabaetan dagiti agtutubo iti nasao a lugar.
Sinitar dagitoy dagiti pulis ket ditoy a naduktalan ken narekober kadagiti menor de edad ti lima a pakete ti maatap nga iligal a droga nga agdagsen iti lima a gramo.
Dagus a nakemmeg dagiti uppat a suspek bayat a dukduktalen dagiti otoridad ti kinasiasino dagiti kakadwada a nakalibas.
