BAGUIO CITY – Nalaos ti panagyaman ni Mixed Martial Arts Fighter Lito “The Thunder Kid” Adiwang kadagiti fans ken supportersna kalpasan ti panangabakna iti rematchda iti padana a Pinoy Fighter a ni Jeremy Miado idi Nobyembre 3.
Maipalagip a naabak ni Adiwang iti umuna a labanda kenni Miado idi Marso 26, 2022 kalpasan a naadaan daytoy ti knee injury.
Iti baet daytoy, intultuloyna a nagsanay nu sadino immakar daytoy iti sabali a team iti sidong ti HIIT Studio idiay Bali, Indonesia.
Iti interview ti Bombo Radyo kenni Adiwang, maibilangna a dakkel a fulfillment ti kaudian a labanna gapu ta napaneknekanna a kabaelanna a makasubbot manipud iti pannakaabakna.
Mamati ti sigud a Team Lakay fighter a nakatulong ti panag-akarna iti sabali a team gapu ta ad-adda a pimmigsa daytoy kas atleta.
Kabayatanna, impeksa ni Adiwang a saan pailaeng daytoy a nakasagana a manglaban kadagiti sigud a teammate na partikular ni Joshua Pacio nga immakar met iti Lions Nation Mixed Martial Arts.
Iti agdama ket puntirya ni Thunder Kid a kalabanen ni Cuban mixed martial artist Gustavo Balart.//Bombo Rosemarie Bulsao
