BAGUIO CITY – Inaklon ita ni Atok Mayor Raymundo Sarac a saandan a kabaelan nga imatonan ti ngumatngato a kaso ti COVID-19 ti nasao a munisipyo.
Iti eksklusibo nga interview ti Bombo Radyo Baguio iti opisyal, kinunana a marigatandan agsipud ta agkurang ti pwersa dagiti doktor ken health care facilities a mangas-asikaso ken mangak-akomodar kadagiti pasiente.
Gapu iti daytoy, kinuna ni Mayor Raymundo Sarac, impeksana ti panagdanagna iti sitwasion ita ti masakupanna a munisipyo.
Inaklonna a saan nga umdas dagiti doktor a mangtamtaming kadagiti pasiente sadiay Atok District Hospital malaksid nga awanen ti suplay dagitoy iti oxygen.
Kinunana a saan payen a maak-akomodar dagiti irekrekomendarda a pasiente sadiay La Trinidad, Benguet ken ditoy siudad ti Baguio gaputta agkurkurangda metten iti pwersa.
Imbinglayna dua a laeng ti quarantine facility dagitoy a masarakan sadiay Poblacion ken iti sentro a Sayangan
Gapu iti daytoy, umap-apela iti tulong ti Atok iti probinsial a gobierno ken dadduma pay a pribado a sektor para iti panakaipaay iti kagawaan ken pagkasapulan kadagiti quarantine facilities.
Iti agdama, nakailista ti munisipyo iti 135 nga aktibo a kaso ti virus, 322 dagiti naimbagan, ken 18 dagiti pimmusay.
