BAGUIO CITY – Ad-adalen pay laeng ti lokal a gobierno ti siudad ti Baguio ti panggep a pananggatangda iti bakante a lote ti Government Service Insurance System (GSIS) sadiay Marcoville a mabalin a pakaipasdekan ti parking area.
Sigun kenni Mayor Mauricio Domogan, karaman a kayatda a gatangen ti tree park iti asideg ti Baguio Convention Center tapnu agserbi a pagparadaan bayat nga agtalinaed dagiti kaykayo iti tree park tapnu agserbi a paset ti environmental preservation ken protection program ti lokal a gobierno.
Innayonna nga ur-urayenda ti desisyon ti GSIS iti umuna a singasing a gatangen laengen ti lokal a gobyerno ti nasao a lote kasaruno ti inisyal a napagnunumuanda iti state insurance corporation iti pananggatangda met iti Baguio Convention Center.
Kinuna met ti GSIS a nasurok P446 million ti posible a gatad ti nasao a lote babaen iti agdama a fair market value daytoy.