Nagpinnirma ti Land Transportation Office (LTO) ken ti lokal a gobierno ti siudad ti Baguio ti katulagan para iti digital connectivity ti traffic system tapno maitandudo ti kinatalged iti kalsada.
Mapalubusan ti LTO iti katulagan a mailinia ti data system ti city government para iti naannayas a pannakaipatungpal dagiti pagannurotan ken linteg ti trapiko.
Sigun kenni LTO chief Vigor Mendoza, daytoy ti umuna nga “interlink ” iti nagbaetan ti nasao nga ahensia ken ti lokal a gobierno.
Kinunana a ti siudad ti Baguio ti kangrunaan a siudad iti Northern Luzon a maisilpo ti sistema ti impormasion ti nasao nga ahensia.
Patien ni Mendoza a makatulong ti nasao a katulagan iti maipapan ti “traffic management,” panagdisiplina kadagiti drayber ken dadduma pay.
Napateg ti interconnectivity kadagiti inisiatibo ti Baguio para iti smart mobility nu sadinno, mabalin nga agserbi a modelo para kadagiti dadduma a lokal a gobierno.
Maipalagip a nabayagen a kidkiddawen ti LTO ti “digitalization” dagiti serbisio ti gobierno, agraman ti pannakaipatungpal ti trapiko tapno maitandudo ti kinatalged iti kalsada.
