BAGUIO CITY – Linagip dagiti progresibo a grupo iti siudad ti Baguio ti maika-36 nga anibersaryo ti tallo-aldaw a People Power Revolution wenno EDSA Revolution a naisayangkat idi Pebrero 22-25, 1986.
Immuna a naisayangkat ti pamisa iti Baguio Cathedral para iti kapia ken hustisya.
Simmaruno ditoy ti solidarity walk iti Session Road a nagleppas iti Malcolm Square kas pananglagip iti panag-rally a naisayangkat iti siudad kagiddan ti panag-rally sadiay Metro Manila.
Nailukat iti publiko ti maysa nga exhibit sadiay Malcolm Square a nakaipakitaan dagiti paspasamak iti EDSA Revolution ken naangay metlaeng sadiay ti maysa a programa ken film viewing.
Iti interview ti Bombo Radyo Baguio kenni Jeoff Laurua, miembro ti progresibo a grupo iti lokalidad, kinunana a kidkiddawenda ti saan a panakaisubli ti naranggas a panagturay ken ti saanen a panakarebisa ti pakasaritaan ti pagilian.
Dinakamatna met a naragpat ti demokrasya ti pagilian idi 1986 ngem gapu kadagiti ‘developments’ a makitkita kita ket maibagada nga arigna agsubsubli ti diktadorya a gobyerno a rason met iti agtultuloy a panangilabanda kadagiti karbengan para iti pagsayaatan dagiti umili.
