BAGUIO CITY – Nasarakan ken narekober ti maika-walo a bangkay iti deppaar ti Marcos Highway sadiay Poyopoy, Taluy Sur, Tuba, Benguet idi agsapa ti pangaldaw.
Sigun kenni P/Major James Acod, hepe ti Tuba Municipal Police Station, resulta daytoy iti kanayonan a panagbirukda iti lugar nga immunan a nakasarakan ti pito a bangkay idi kanikadua.
Nagturong metlaeng sadiay dagiti sumagmamano a pamilya a mapukpukawan ti kabagian ken maysa a pamilya ti nangbigbig iti maika-walo a bangkay.
Sigun kenni Virgie Ticwado, ti maika-walo a bangkay ket ti kaanakanna nga inreportda a missing iti pulisya kalpasan a saan a nagaw-awid idi pay October 8.
Kinunana a ti maika-walo a bangkay ket ni Kent Charlie “KZ” Lubiton Licyayo, 22-anyos, residente ti Ucab, Itogon, Benguet ken tubo ti Hingyon, Ifugao.
Kinumpirmar met ti nobya ni Licyayo ti pakabigbigan daytoy babaen iti suot daytoy nga aritos, singsing, boxer short ken short pant.
Sigun iti pamilya, nagturong ditoy Baguio ni Licyayo manipud Hingyon, Ifugao idi umuna a lawas ti Hunyo ken naudi a nakita idi October 8 iti maysa a bus terminal ditoy siudad.
Kabayatanna, binigbig met ti ama ken kabsatna ti maikatlo a bangkay a narekober idi kanikadua.
Nabigbig daytoy a ni Fahad Manan Macalanggan, 28-anyos, maysa a Maranao ken residente ti Crystal Cave, Baguio City.
Nabigbig daytoy babaen kadagiti tattoo iti kanawan ken kanigid a takiagna.
Iti agdama ket agtaltalinaed dagiti bangkay iti maysa a punerarya sadiay Marcos Highway para iti panakakumpirmar ti pakabigbigan dagitoy ken iti panakaisayangkat ti otopsiya.
