BAGUIO CITY – Naipaay ti maikadua a highest military award iti Igorot Captain a nangidaulo iti panakaispal ti agasawa a Briton ken Pinay sadiay Sulu a na-kidnap wenno nakawtibo sadiay Sulu idi napalabas a bulan.
Personal nga inyawat ni Presidente Rodrigo Duterte ti Distinguished Conduct Star kenni Captain Rico Tagure iti naangay a maika-84 nga anibersaryo ti Armed Forces of the Philippines sadiay Camp General Emilio Aguinaldo, Quezon City.
Ni Captain Tagure ket dadaulo ti 4th Special Forces Company ti 2nd Special Forces Battalion ti Philippine Army.
Naipaay kenkuana ti nasao a pammadyaw gapu iti kinatured ken kinabannuar nga impakitana iti panangidaulona iti grupona a nangispal iti nasao nga agasawa a da Allan ken Wilma Hyrons.
Kinamkamat ti tropa ti gobyerno dagiti militante iti manun a lawas a nagresulta iti sumagmamano a rinnupak, iti panakatay ti lima a kalaban ken iti panakaispal ti agasawa.
Nakawtibo ti agasawa bayat ti kaaddada iti maysa a beach resort sadiay Zamboanga del Sur idi Oktubre 4 ken inturong dagiti gunmen dagitoy sadiay Jolo.
