Pimmusayen ti maysa pay a volunteer iti search and rescue operation a naisayangkat para kadagiti small-scale miners a na-trap iti tunnel idiay Runruno, Quezon, Nueva Vizcaya a napasamak itay laeng nabiit.
Nabigbig ti lalaki a ni Johny Ayudan nga agtawen ti 38.
Immuna a pimmusay ti maysa pay a rescue volunteer a ni John Philip Guinihid, 20-anyos, a timmulong metlaeng iti panagsapul kadagiti na-trap a minero.
Ni Ayudan, Guinihid ken ti maysa pay a volunteer ket simrek iti tunnel parbangon idi Hunio 25.
Bayat nga adda dagitoy iti tunnel, narigatan da Ayudan ken Guinihid iti panaganges ken napukaw ti puotda. Nabaelan met ti kaduada a nakaruar iti tunnel.
Ti bangkay ni Guinihid ket narekober manipod iti tunnel iti agarup 2:45 p.m. iti nasao a petsa, bayat a ni Ayudan ket nairuar a sibibiag kalpasan ti maysa nga oras ken dagos a naiturong iti pag-agasan.
