Kiddaw dagiti grupo ti mannursuro kenni President Ferdinand Marcos Jr. a ti maisublat kuma a Department of Education Secretary ket ti makabayan, makamasa, ken agtaud iti sektor ti Edukasyon.
Kasaruno daytoy ti panaglusolus ni Vice President Sara Duterte kas sekretarya ti Department of Education ken Vice Chairperson ti National Task Force to End Local Communist Armed Conflict (NTF-ELCAC) idi Miyerkules, Hunyo 19, 2024.
Iti exclusive interview ti Bombo Radyo kenni Ruel Caricativo, Regional Coordinator Alliance of Concerned Teachers – Cordillera, maragsakan dagitoy iti panaglusolus ni VP Duterte kas sekretarya gapu ta makitkitada a saan a nagballigi daytoy iti panagbalinna kas dadaulo ti Department of Education iti napalabas a dua a tawen.
Sigun kenni Caricativo, iti laksid a nangiruar ni Duterte iti ado a memorandum para kadagiti maestra a pakairamanan ti uniterrupted vacation ken panakabawas dagiti workload, agtaltalinaed a saan a narisut dagiti isyu a sangsangoen dagiti mannursuro, estudyante ken dagiti nagannak.
Kairamanan ditoy ti saan a naurnos a kurikulum iti agdama ken ti saan a panakaipangag dagiti kiddaw dagiti mannursuro a panakaipangato ti sueldo dagitoy.
Innayona pay a gapu iti nagduduma a pakaseknan iti sektor ti edukasyon ket saan unay a matutokan dagiti estudyante rason nga agbalbalin a nakapoy da iti reading, mathematics and science proficiency, ken critical thinking.
Dagitoy a resulta ket maibasar iti nagduduma a panagadal a naisayangkat iti pagilian.
Dinakamat pay ni Caricativo a nasken nga ipaay ti gobyerno ti kangrunaan a suporta iti sektor ti edukasyon tapno mapasayaat ti kapabilidad dagiti estudyante.
Pakairamanan daytoy ti panangpasayaat ti kurikulum, panangipaay iti nasayaat a working conditions kadagiti mannursuro, panakaipangato ti pondo ti Department of Education ken ti panakadenggeg kadagiti arungaing dagitoy.//Bombo Mera Pacpacan
