Nangrugi a nagurnong dagiti mangsupsuporta iti administrasion ni President Ferdinand “Bongbong” Marcos Jr. ita nga agsapa iti aglawlaw ti Sandiganbayan idiay Commonwealth Avenue, Quezon City asideg iti Batasan Pambansa complex, a pakaangayan ti panagbitla ni President Marcos iti maikatlo a SONA daytoy.
Maimatangan dagiti tarpaulin nga addaan ladawan ni President Marcos Jr, nga adda ti nakasurat nga “All the way for BBM” ken “Tunog ng Bagong Pilipinas (Sound of the New Philippines)” iti nasao a lugar.
Kaadwan kadagiti nakipaset iti lugar ket nakabado ti maris nalabbaga, puraw ken nangisit a bado.
Sumagmamano kadagitoy ket mangibanbandera ti watawat ken lanyards.
Naituding ti programa dagiti grupo ti pro-Marcos One Movement iti ala una ti malem ken mapasamak ti panagpabuya da Ara Mina, Rodjun Cruz, Jireh Lim, John Nite, ken dadduma pay nga artista.
