BAGUIO CITY – Manarimaan ti pulisya ti manhunt operation kontra iti maysa a retirado nga empleyado ti gobyerno a nangpatay iti manugang-na sadiay Sta. Pukaw, Poblacion, Kabugao, Apayao idi parbangon.
Nabigbig daytoy a ni Peter Patayan, 68 bayat a ti biktima ket ni Jaime Tamayao Enciso, 45, agpada a residente iti nasao a lugar.
Maibasar iti imbestigasyon ti pulisya, nagawid a nabartek ti biktima ken sinapolna ti asawana iti balay ti katugangan-na nga agsagsagana iti panagturongda sadiay Luna, Apayao.
Maatap a binarsak ti biktima ti balay ti katugangan-na agingga a naaddaanda iti nabara nga argumento.
Rimuar ti suspek iti balayna ken sinurotna ti biktima ket pinaltoganna babaen iti handgun sakbay a naglibas.
Naitaray ti biktima iti Kabugao District Hospital ngem naideklara a dead on arrival gapu iti sinagrapna a maysa a tama ti paltog iti kannigid a barukongna.
Narekober met iti crime scene ti maysa a basyo ti caliber 45 ngem saan a narekober ti paltog a naaramat iti nasao a krimen.
