Nakemmeg ti mapapati a gunman iti pammapatay ti broadcaster Eduardo ‘Ed’ Dizon idi tawen 2019 idiay Kidapawan City, North Cotabato.
Daytoy ket sigun iti Presidential Task Force on Media Security (PTFoMS) ita nga aldaw.
Kinuna ni Presidential Task Force on Media Security executive director Undersecretary Paul Gutierrez a ti suspek ket nabigbig a ni Junell Jane Andagkit Poten or “Junell Gerozaga, agtawen ti tallo pulo ket tallo.
Naarestar ni Poten idiay Barangay Saguing, Makilala, Cotabato iti rabii ti Huwebes kalpasan a nakaawat dagiti otoridad ti impormasion ti lokasion daytoy.
Maipalagip nga idi July 10,2019, ni Dizon ket paturong iti balayda a nakasakay ti luganna idi adda ti dua nga indibidual ti kellaat a pimmaltog.
Gapu iti dayta, pimmusay “on the spot” ni Dizon kalpasan a nagsagrap ti lima a putok ti paltog.
Itay laeng bulan ti Abril iti agdama a tawen, imbilin ni Justice Secretary Jesus Crispin Remulla a mangbukel ti special investigation team tapno mang-imbestigar iti pammapatay ni Dizon.
Kasaruno daytoy ti pannakaipaay ti piansa idi Marso kadagiti padana a naakusaran ken maatap a dadaulo iti nasao a krimen a da Dante Encarnacion Tabusares wenno “Bong Encarnacion” ken Sotero ‘Jun’ Jacolbe.
Maibasar iti imbestigasion, pinanggep dagiti suspek a papatayen ni Dizon gapu iti panangbabalawna iti Encarnacion ken ti KAPA Ministry, nga imbilin ti gobierno a mairekep idi 2019 gaputa maysa daytoy a grupo ti “financial scam”.
Mabigbigbig a ni Encarnacion ti dadaulo ti KAPA Ministry idiay North Cotabato.
