BAGUIO CITY – Posible nga ipatungpal manen ti lokal a gobierno ti La Trinidad, Benguet ti Market Schedule kadagiti nagduduma a barangay sadiay kagiddan ti panakaipasidong ti probinsya ti Benguet iti General Community Quarantine.
Iti panakiuman ti Bombo Radyo Baguio kenni Mayor Romeo Salda, kinunana a kitkitaenda ita ti posibilidad a panakaisubli ti panagaramat dagiti umili ti market pass tapnu malimitaram ti panaggaraw ken iruruwar dagiti tattao kadagiti pagtaenganda.
Maibasar iti Market Day Schedule, nailatang ti Lunes para kadagiti residente ti Pico ken Bineng; Martes para kadagiti residente ti Balili ken Alno; Miyerkoles para kadagiti residente ti Poblacion, Beckel ken Cruz; Hwebes para kadagiti residente ti Tawang, Alapang ken Shilan; Biyernes para kadagiti residente ti Puguis, Bahong ken Wangal bayat a ti Sabado ket nailatang para kadagiti residente ti Betag, Ambiong ken Lubas.
Naituding met ti Domingo kas market day dagiti authorized persons outside of residence a mangrugi iti 6:00AM agingga 1:00PM a sarunuen ti panakaipatungpal ti disinfection iti merkado.
Malaksid iti dayta, kinunana a rugianda metten nga agtiliw kadagiti aglabsing iti curfew ken liqour ban.
Inlawlawagna pay a malimitaran dagiti social gathering nangruna ta naduktalan a maysa daytoy a rason ti napartak a panagwaras ti COVID-19.
Sigun pay kenni Mayor Salda, adaptarenda dagiti sumagmamano a pagalagadan nga ipatpatungpal iti Provincial IATF mangrugi inton bigat, Setyembre 8, 2021.
