BAGUIO CITY – Mas organisado ita ti vegetable trading iti nagduduma a trading centers sadiay La Trinidad, Benguet partikular iti Benguet Agri-Pinoy Trading Center (BAPTC) ken iti La Trinidad Vegetable Trading Post (LTVTP).
Resulta daytoy ti baro a maipatpatungpal a clustering scheme para iti panakaideliver ken panakaibaba dagiti natnateng nga agtataud iti nagduduma a munisipyo iti Benguet, Ifugao ken Mountain Province.
Maipalagip a nagudwa ti dua a grupo dagiti munisipyo iti tallo a probinsia ken naipaayan dagitoy iti tallo nga aldaw iti makalawas tapnu iturong dagiti produktoa kadagiti trading areas sadiay La Trinidad manipud Lunes agingga Sabado.
Sigun kenni Department of Agriculture – Cordillera Agribusiness and Marketing Assistance Division chief Jerry Damoyan, babaen iti nasao a sistema ket naksayan dagiti adu a natnateng a maiturturong kadagiti trading areas ken addan ti magatang a nagduduma a nateng manipud iti nagduduma a vegetable-producing municipalities iti lokalidad.
Kinuna met ni BAPTC market facilitator Gina Cabading a kontroladon ti panakaiwaras dagiti nateng gaputa saanen nga agrarana ti panagsangpet sadiay dagiti lugan nga agitulod iti nateng.
Innayonna a no mabalin ket maituloy ti nasao a sistema gapu iti napintas a bungna iti transaksion dagiti nateng sadiay BAPTC.
