BAGUIO CITY – Linawlawagan ti lokal a konseho ti siudad ti naobserbaran a masansan a panakairekkep tii nalatak a Session Road.
Iti interview ti Bombo Radyo Baguio, inlawlawag ni Councilor Philian Louise Weygan-Allan a temporaryo a mairekkep ti nasao a disso iti aldaw ti dominggo kas paset ti panangobserbar iti national food month a maselselebraran ita a bulan.
Kinunana a maipada daytoy idi napalpalabas a bulan no sadino naiparekkep ken nagserbi metlaeng a paglakoan ti session road iti panakarambak ti national women’s month.
Impettengna a maiyem-implementar daytoy tapnu masuportaran ti pedistrianization a programa ti siudad ken maital-o dagiti nagduduma a festibidad ti lokalidad
Inaklon pay ti opisial a saan a maliklikan nga agriri dagiti vendors iti merkado publiko gaputta dagiti ilaklako dagitoy a produkto kas iti nateng ket isu metlaeng ti mailaklako sadiay session road.
Nupay kasta, inlawlawagna mismo a dagiti local farmers ti naipaayan iti gundaway nga aglako kadagiti produktoda a nateng sadiay session road.
Patienna ti konsehal a maysa a wagas daytoy tapnu matulongan dagiti displaced workers nangruna dagiti mannalon a marigatan a mangibiyahe kadagiti produktoda a nateng sadiay Metro Manila gapu iti travel restrictions.
Impanamnamana met a saan a tunggal dominggo ket mairekkep daytoy gaputta nakadependar iti tunggal festibidad wenno okasion a maobserbaran ken maselebraran ditoy Baguio City.
