BAGUIO CITY – Immapela ni Itogon Mayor Victorio Palangdan kadagiti amin a hikers ken tour guides a tungpalenda ti pammilin dagiti maseknan nga ahensia seknan iti panakaipasardeng dagiti hiking activities iti nasao a munisipyo.
Sigun kenkuana, daytoy ket tapno maliklikan ti saan a nasayaat nga insidente gapo iti mapaspasaran a panagtutudo ditoy lokalidad.
Innayonna a babaen metlaeng iti nasao nga addang ket saan a maulit ti napasamak kadagiti hikers a turista manipod Bulacan ken Manila.
Maipalagip a naiyaw-awan ti maysa kadagitoy iti baet nga adda kadwada a dua a local tour guides.
Naduktalan a saan dagitoy a nakikoordinar iti lokal a gobyerno sakbayda nga intuloy ti aktibidad dagitoy.
Naamuan a simrek dagiti hikers iti Mt. Ugo manipud sadiay Nueva Viscaya ken iti kaaddada iti bantay ket napukaw ti maysa kadagitoy.
Dagus metlaeng daytoy a naispal babaen iti panagresponde ti Itogon MDRRM Office ken dagiti barangay officials ti Barangay Tinongdan.
Gapo iti nasao a pasamak ket napalagipan dagiti tour guides ken hikers a sakbayda nga agturong kadagiti kabambanatayan wenno hiking areas ket ipaka-ammoda iti maseknan nga opisina iti akinsakop a lokal a gobyerno. (-with Bombo Florence Paytocan)
