BAGUIO CITY – Sumangsango iti kaso nga administratibo ti mayor ti Boliney, Abra gapu iti panakapaay ti lokal a gobyerno sadiay nga agtungpal iti pammilin ni Presidente Rodrigo Duterte mainaig iti panakadalus ken panakaikkat dagiti amin a sali kadagiti kalkalsada ken iti panakaisubli dagitoy iti motorista.
Iti interview ti Bombo Radyo kenni Department of the Interior and Local Government (DILG) – Cordillera Regional Director Engr. Marlo Iringan, kinunana a tallo a kategorya ti saan a natungpal ti local government unit (LGU) ti Boliney, Abra ng idadauluan ni Mayor Benido Balao-as Sr.
Kinunana a napaay ti Boliney LGU a mangisumitir iti inventory dagiti provincial, municipal ken barangay roads; mangisayangkat ti aktuwal a panagdalus kalpasan a nakitaan iti extended canopies ti maysa a provincial road sadiay Boliney ken napaayda pay a mangbukel iti grievance and feedback committee.
Dinakamatna a ‘poor’ ti rating ti Boliney LGU kas maibasar iti validation ken assessment iti panagtungpalda kadagiti standards ti nationwide road-clearing drive.
Innayon ni Iringan a sakbay a naipila ti gross neglect of duty ken grave misconduct kontra kenni Balao-as Sr. ken dadduma pay a mayor iti pagilian ket naipaayan dagitoy iti gundaway nga agpalawag iti nagbalin a performance dagitoy.
Nupay kasta, kinunana a saan a napnek ti nadutukan nga ag-evaluate kadagiti palawag dagiti nasao a mayor a nagresulta iti panakaipila dagiti kaso nga administrabo kontra kadagitoy iti Office of the Ombudsman.
