BAGUIO CITY – Naiparikep ti maysa a bar-cum-billiards joint gapu iti namin adu ken sidadata a panaglabsingna iti Ordinance No. 34 series of 2017 ti Baguio City wenno ti Smoke-Free Baguio Ordinance.
Naamuan a daytoy ti kaunaan a pasdek wenno negosyo ditoy Baguio nga imparikep ti lokal a gobyerno ti siudad gapu iti namin adu a panaglabsing iti Smoke-Free Baguio Ordinance.
Insayangkat dagiti personnel ti City Permits and Licensing Office, Public Order and Safety Division (POSD), Baguio City Police Office, Smoke-Free Baguio Project Team-The Union ken dagiti opisyal ti maseknan a barangay ti panakai-padlock ti Agpad Bar and Billiards a masarakan iti Kabayanihan Street.
Naisayangkat ti operasyon babaen iti bileg ti Closure Order nga impaulog ni Mayor Benjamin Magalong.
Naamuan nga inrekomendar ti POSD ti panakawaswas ti business permit ti nasao nga establishimento gapu iti paulit-ulit a panaglabsingda iti ordinansa a mangipawpawail iti panagaramat, panagilako wenno distribusyon ken panangital-o iti tobacco cigarette, other tobacco products ken e-cigarettes iti sumagmamano a disso.
Naipaayan ti Agpad Bar and Billiards iti pito a citation tickets babaen kadagiti enforcers ti POSD ken tallo a citation tickets babaen iti Kabayanihan Barangay.
Sigun iti Smoke-Free Baguio Task Force, nakaawatda iti sumagmamano a reklamo mainaig kadagiti panaglabsing ti nasao nga establishimento kas iti panagsigarilyo iti parapubliko a lugar, panakaipalubos ti panagsigarilyo ken panagilako iti sigarilyo nga awanan ti pammalubos.
Nasitar pay ti establishimento gapu iti kinarugit daytoy.
Sigun iti task force, mailukat laeng ti nasao a negosyo no maiproseso ti agtagikua ti business permits-na ken no siento porsiento nga agtungpal daytoy iti linteg.
Mangnamnama ti lokal a gobyerno nga agserbi a ballaag kadagiti dadduma pay nga establishimento ti panakairikep ti Agpad Bar and Billiards.
Nupay kasta, namnamaen ti lokal a gobyerno nga adda pay dagiti kanayonan nga establishimento a maiparikep metlaeng apaman a maipinal ti rekord dagiti naglabsing iti Smoke-Free Baguio Ordinance a naibasar iti agtultuloy a panagwanawan ti task force.
