Inladawan ni Maria Victoria Bugasto ti laban iti cancer kas maysa a gubat iti uneg iti bukod a bagi.
Nadayagnos daytoy iti stage 4 breast cancer idi tawen 2005 ken naipasidong iti bilateral mastectomy ken tallo a kangrunaan a surgeries.
Kinunana a dumanon iti P140,000 tunggal 21 nga aldaw ti mabusbosda iti chemotherapy.
Ngem gapu iti Generics Act of 1988 ken ti tulong pinansial manipod iti gobierno, ad-adda a nabaelanda ti panangpaagas.
Dinakamatna metlaeng ti suporta manipod iti PhilHealth, Malasakit Centers, Philippine Charity Sweepstakes Office o PCSO, Department of Social Welfare and Development ken kadagiti lokal a gobierno.
Aktibo iti agdama ni Bugasto kas cancer advocate ken kameng iti Cancer Coalition Philippines ken ICanServe Foundation.
Sigun kenkuana, saanen a death sentence ti cancer.
Napateg ti nasapa nga screening ken umno a konsultasion iti doktor gaputa ti early detection ket mangipaspal iti biag.
