BAGUIO CITY- Nakemmeg ti maysa a lalaki kalpasan a pinaltoganna ti maysa a collector sadiay Brgy. Doña Loreta, Pudtol, Apayao idi kalman, Hunyo 12.
Nabigbig daytoy a ni Robert Balanan Bulsao, 58-anyos.
Nabigbig met ti biktima a ni Jandy Padeway Yadan, 23-anyos, nga iti agdama ket agpapaimbag iti paggagasan.
Maibasar iti imbestigasyon, magmagna ni Yadan iti ruar ti pagtaengan ni Bulsao idi nangngegna a nagpukkaw daytoy.
Inasitgan ni Bulsao ni Yadan ken sadiay pinaltoganna babaen iti Cal. 45 a paltog.
Dagus a naitaray iti ospital ni Yadan ken boluntaryo met a simmuko ni Bulsao iti Pudtol Municipal Police Station.
Boluntaryo metlaeng nga insukona ti maysa a paltog nga addaan ti maysa a magazine ken lima a bala.
Maisagsagana metten ti kaso a maipila kontra kenkuana.
