Inkeddeng ti US Department of Education’s Office for Civil Rights idi Lunes a sinalungasing ti University of Pennsylvania idiay Estados Unidos dagiti garantia ti Title IX kontra iti sex discrimination idi pinalubosanna ti maysa a transgender a babai a makisalip iti women’s swimming team daytoy.
Natakuatan nga inlibak ti nasao a pagadalan ti linteg a rumbeng a dagiti babbai nga atleta ket makibalubal laeng ti padada a babbai, kasta met kadagiti lallaki.
Gapu iti dayta, imbilin ti maysa nga opisial iti nasao a pagadalan nga ikkatenna ti record ti transgender a nangabak iti pasalip.
Maipalagip nga impaulog ni United States President Donald Trump ti executive order a napuloan ti “Keeping Men Out of Women’s Sports” idi Pebrero 5, ken impasiguradona a pasardengenna ti federal fund kadagiti elementaria, sekondaria ken post-secondary nga institusion a mangipalubos kadagiti transgender a babbalasitang wenno babbai a makisalip kadagiti girls wenno women’s team.
Idi laeng bulan ti Marso, pinuted ti White House ti $175 milion a federal fund para iti Penn a mainaig iti isyu ti transgender athlete.
