BAGUIO CITY – Pimmusay ti maysa a pahinante bayat nga agpatpataming ti dua pay a pahinante kalpasan a nadangran dagitoy gapu iti panakaidungpar ti truck iti Marcos Highway idiay Bontiway, Poblacion, Tuba, Benguet idi kalman, Hulyo 11.
Maibasar iti inisyal nga imbestigasyon, temporaryo a nakaparada ti truck nga imanmaneho ni John Mark Montemayor Villa Franca iti igid ti kalsada bayat nga iyal-alis dagiti pahinante ti nateng iti maysa pay a truck idi kellaat a nag-abante ti truck a rason ti panakaidungparna iti paset ti nakaparada a Mitsubishi Montero.
Nagtultuloy a nag-abante ti truck a rason met ti panakaidungparna iti paset ti UV Jitney nga imanmaneho ni Romy Bolayo nga agdaldalyasat iti kalsada sakbay a naidungpar iti maysa a pasdek.
Nadalusan metten dagiti nateng a naiwara iti paset ti nasao a kalsada.
Iti agdama, adda iti kustodiya ti Tuba MPS ni Villa Franca ken manarimaan ti panangduktal dagiti maseknan nga otoridad iti danyos ti panakadadael iti paset ti truck ken maysa pay a lugan.
This is a developing story…
