Naarestar ti maysa Pilipino sadiay Long Beach, California, kalpasan a naakusaran a nangipatulod ti kuarta iti Islamic State of Iraq and Syria (ISIS), maysa a foreign terrorist organization.
Naidarum ni Mark Lorenzo Villanueva, agtawen iti 28, gapu iti panangpadasna a mangipaay iti material support iti foreign terrorist organization.
Panaglabsing daytoy iti linteg ken posible a maibalud iti 20 a tawen dagiti siasino man nga aglabsing.
Naituding ti initial appearance ni Villanueva iti United States District Court idiay Los Angeles intun Martes, August 12.
Sigun kenni Atty. Bill Essayli, dakkel a peggad iti seguridad ti pagilian wenno abroad ti panangsuporta iti maysa a grupo dagiti terorista.
Inkari ni Essayli a birukenda ken idarumda ti asinoman a mangipaay iti suporta kadagiti kabusor dagitoy.
Maibasar iti criminal complaint nga impila ti federal prosecutors, maatap nga adda ti komunikasion da Villanueva ken ti dua nagpaam-ammo a kameng ti ISIS fighters babaen iti social media.
Iti komunikasion dagitoy, impeksa ni Villanueva a kayatna a makipaset iti nasao a grupo ken impeksana ti tarigagayna a lumaban para iti ISIS.
Sigun met kadagiti Prosecutors, imbaga ni Villanueva iti maysa kadagiti kameng ti ISIS nga addaan daytoy iti bomba ken kutsilio.
Nasarakan met ti maatap nga explosive device iti kuartona, kabayatan ti pannakaarestar kenkuana dagiti FBI agents.
Kabayatanna, maibasar iti rekord ti prebado a money sender, nangipatulod ni Villanueva iti $1,615 iti las-ud ti lima a bulan.
