BAGUIO CITY- Sumangsango iti kaso a panagrames ti maysa a Police Major manipud Baguio City kalpasan a maatap a rinamesna ti maysa a patrolwoman sadiay Davao Oriental idi Hunyo 10, 2022.
Ti suspek ket agtawen iti 35-anyos, nakadestino iti 2nd Davao Oriental Provincial Mobile Force Company kas OIC- Force Commander ken residente ti Baguio City.
Ti biktima met ket agtawen iti 34-anyos, nakadestino iti kapada a yunit ti pulisya ken residente ti Lower Abejod, Cateel, Davao Oriental.
Maibasar iti report, dimmar-ay ti biktima ken ti suspek kadwada dagiti katrabahoda iti Guardians Battalion Quarterly Socials idi Hunyo 9, alas otso ti rabii.
Sigun iti biktima, nag-inum daytoy ti maysa a bote ti arak kabayatan ti nasao nga aktibidad bayat a dagiti kakadwana ket nag-inum iti nasanger.
Nagsubli dagitoy iti opisina ti 2nd DOPMFC idi 11:45 ti rabii ngem imbaon pay ti suspek ti striker dagitoy nga agala ti arak tapno ituloyda nga aginum.
Inmuna a naturog ti biktima ngem nariing daytoy iti alas tres ti parbangon ti Hunyo 10, gapu iti panagtuktok ti suspek iti kwartona.
Kinasarita ti biktima ti suspek nga isardengna nga agtuktok ngem ditoy nga induron ti suspek ti biktima ken sadiay a napasamak ti panagrames.
Impetteng ti biktima a nagbuteng daytoy isut gapuna a saan a dagus a nagpatulong kadagiti kakadwana.
Nupay kasta, nagtured metlaeng daytoy a nangireport iti nasao nga insidente idi Hunyo 10.
Dagus met a nakemmeg ti suspek bayat a naipasidong ti biktima iti medical examination.
