BAGUIO CITY- Nakemmeg ti maibilbilang kas Regional Top Ten Illegal Drug Personality iti buy-bust operation dagiti otoridad sadiay Irisan, Baguio City itay alauna ti parbangon (1:45 a.m May 27).
Nabigbig daytoy a ni Jomar Lacorte Viloria, 37-anyos, naasawaan, taxi driver ken residente ti Rock Quarry, Baguio City a sigud a drug surenderee idi 2018.
Nakumpiskar manipud kenkuana ti maysa a pakete a naglaon iti maatap a shabu nga agdagsen iti 2.5 grams ken aggatad iti P17,000.
Naala metlaeng manipud kenni Viloria ti maysa a pedaso ti one-thousan-peso bill kas buy bust money; siyam a pedaso ti one-thousand-peso bill kas boodle money ken maysa a cellphone.
Naipatungpal ti buy-bust operation babaen iti body worn camera.
Manamnama a mapilaan ni Viloria iti kaso a panaglabsing iti RA 9165 wenno ti Comprehensive Dangerous Drugs Act of 2002.
