Kinumpirmar ti Office of Civil Defense (OCD) sadiay Davao Region a maysa ti pimmusay gapu iti epekto ti Habagat ken Typhoon Kiyapo idi Sabado, July 25, 2026.
Sigun kenni OCD Region 11 Director Ednar Dayanghirang, apektado ti Davao City iti Habagat a nangitunda iti panagbakwit dagiti umili iti tallo a barangay.
Maysa ti pimmusay kalpasan a naiyanod bayat a nakalugan iti motorsiklo sadiay Barangay Talandang, maikatlo a distrito ti Davao City.
Kabayatanna, awan ti nailista ti OCD Region 11 a mapukpukaw wenno nadangran.
Nupay kasta, dumanon iti 300 a pamilya ti naapektaran idiay barangay Talomo Proper, Katalunan, ken Intal.
Sigun kenni Dayanghirang, ngimmato ti libel ti danum iti Matina River a nangtignay iti preemptive evacuation kadagiti asideg a komunidad.
Nagsubli ti kasasaad ti karayan iti green code idi agsapa ti Sabado, Hulio 25, 2026.
