Posible a maipasara ti maysa nga store sadiay Barangay Military Cut-Off no saanna nga isardeng ti iligal a panagilakona iti sigarilyo.
Iti panakiuman ti Bombo Radyo kenni Joshua Daniel Rivera, Communications Development Officer I ti Smoke Free Baguio, nangisayangkat dagitoy iti ocular inspection ken ditoy a nakitada nga adda ti iligal nga agilaklako iti sigarilyo.
Sigun kenni Rivera, kadawyan a customer daytoy ket dagiti taxi drivers rason nga ado a taxi ti nakaparada iti nasao a lugar.
Malaksid iti dayta, adda pay ti naaramid a picnic area iti masakupan ti watershed ti Bawadi nga asideg iti nasao nga store.
Kinuna met dagiti tattao sadiay a naipakada daytoy nga a maaramid kas picnic area nupay kasta, nasken nga ikumpirma pay daytoy dagitit otoridad gapu ta masakupan a mismo daytoy ti watershed.
Ngem, naimatangan met dagitoy nga iti picnic area ket agsigsigarilyo dagiti tatatao nga adda sadiay.
Iti agdama, kinuna ni Rivera a manarimaan iti koordinasyonda iti Bawadi, Baguio City Police Office Police Station 8 ken daduma pay a maseknan nga ahensya para iti panakarisut ti nasao a pakaseknan.//Bombo Noveh Organo
