Nainget a maipatpatungpal ti memorandum ti Department of Interior and Local Government (DILG) a clean up drive kadagiti residente ti Bauko, Mt. Province.
Sigun kenni Carlos Lartec, Senior Environment and Mangement Specialist iti MENRO ti Bauko, ti nadakamat a memorandum ket iti panagdalus dagiti umili iti mamin-uppat a daras iti makabulan, nu sadinno dagiti umili ket agdalos kadagiti paraanganda kasta metten dagiti batogda a kalsada ken kanal iti tunggal dominggo.
Sigun kenni Edna Bandiwan, maysa a residente iti Barangay Tapapan, maysa a wagas tapno madalusan dagiti paraangan dagitoy ket iti panagpidot ken panangisina kadagiti basura a marunrunot ken dagiti saan a marunot kasta metten dagiti “hazardous waste.”
Innayonna pay a ti regular a panagdalus ket dakkel ti tulongna tapno mapagtalinaed ti kinadalus iti lugar dagitoy.
Kabayatanna, kinuna met ni Jaycel Jane Omipet, maysa a residente iti Barangay Abatan a saan daytoy a makipaspaset gaputa saan a maipadpadamag kenkuana ti nasao nga aktibidad.
Nupay kasta, imbinglayna metlang a makitana ti epekto ti maararamid nga aktibidad iti aglawlaw dagitoy.
Iti sabali a bangir, addaan met iti ordinansa ti munisipyo a Clean Up Drive a mapasamak iti maysa a daras iti tunggal bulan.
Mainaig iti dayta, impakaamo dagiti otoridad iti nasao a barangay a maipatungpal ti Clean Up Drive inton Lunes, Hunio 10 kas pannakipaset metlaeng iti “World Environment Day”.//Via Jenelle Balagne, Local News Correspondent
