Parikut paylaeng dagiti opisial ti La Trinidad dagiti menor de edad nga agturturong iti maysa a bantay sadiay Ambiong, La Trinidad, Benguet.
Iti pannakiuman ti Bombo Radyo ken da Hector Chamos ken Banwas Songyap, agpada a barangay kagawad iti Barangay Ambiong, kinunada nga agbalbalin a pag-iinuman dagiti agtutubo a lallaki ken babbai ti abandonado a bantay.
Malaksid iti dayta, pakaseknan metlaeng dagiti opisial dagiti agtutubo agsipudta, naglalaawda.
Kinunada pay a pagturturugan dagiti adu nga agtutubo ti nasao a bantay gaputa nasarakanda ti adu a babbai a nakaturog sadiay nga awanan iti ules.
Patien dagitoy a saan laeng nga agtutubo manipud iti Ambiong dagiti menor de edad nga agturturong iti nasao a lugar no diket karaman dagiti sumagmamano nga agtutubo iti siudad ti Baguio.
Sigun ken da Chamos ken Songyap, tiltiliwenda dagiti agtutubo ken maiturturongda iti opisina ti pulisia kasta met iti opisina ti Department of Social Welfare and Development ken Women tapno maipaayanda iti umno a pannusa.
Nupay kasta, bilinen metlaeng dagitoy dagiti otoridad nga awaganda laengen dagiti nagannakda a mangsukon kadagitoy.
malaksid iti panagronda, maysa pay a pamuspusan dagiti opisial ket ti panagipaayda ti pammagbaga ken awaganda dagiti nagan tapno masukon dagitoy.//Bombo Noveh Organo
