![](https://img.bomboradyo.com/baguio/2021/06/alias-alos.jpg)
BAGUIO CITY – Simmuko iti tropa ti gobyerno ti maysa a miembro ti Milisyang Bayan sadiay Casamata Hill, Zone 5, Bangued, Abra idi kanikadua.
Sigun kenni Major General Alfredo Rosario Jr., commander ti 7th Infantry Division ti Philippine Army, ti rebel returnee ket ni alias ‘Los’, 58-anyos a resident ti Alangtin, Tubo, Abra ken miembro ti Milisyang Bayan ti New People’s Army nga addaan operasyon iti Abra, Mountain Province ken Ilocos Sur.
Kinunana a ti panagsuko ni alias Los ket resulta ti nainget nga intelligence operations ken panakaisayangkat ti Community Support Program ti militar ken pulisya.
Insuko pay ti rebel returnee ti maysa nga M16 A1 rifle, maysa nga M653 rifle, maysa a long magazine ken walo a bala.
Mangnamnama met ni Major General Rosario Jr. nga iti kaadu dagiti simmuko ken nangibinglay iti panagrigatda iti uneg ti terorista a grupo ket awanen dagiti maallilaw ken maallukoy a kumappeng iti nasao a grupo.
Kinunana a gapu iti daytoy ket ad-adda a pinasayaatda ti Community Support Program kadagiti barangay nga addaan ti presensia dagiti rebelde tapnu maallukoy dagiti nabatbati a rebelde iti panagsuko ken panagrugida iti nataltalna a biag, kadwa dagiti pamilyada iti komunidad.