BAGUIO CITY – Nakemmeg ti maysa a minero a maatap a suplayer dagiti padana a minero iti iligal a droga iti checkpoint operation nga insayangkat dagiti otoridad idi kanikadua sadiay Virac, Itogon, Benguet.
Nabigbig daytoy a ni Benjie Gulod Ayang-ang, 27-anyos, baro, minero ken residente iti Virac, Itogon, Benguet.
Sigun kenni PMaj. Rommel Sawatang, hepe ti Itogon Municipal Police Station, maysa a drug surrenderee ni Aya-ang ken nabalakadan a maipasidong iti recovery development program ngem saanna nga inleppas daytoy.
Kinunana a namonitor metlaeng ti pulisya nga intuloy ni Ayang-ang ti maatap a panaglaklakona ti illegal a droga.
Innayonna a nagturong iti siudad ti Baguio ni Ayang-ang, no sadino, atapen ti pulisya a napan gimmatang daytoy iti illegal a droga.
Gapu iti daytoy, nangisayangkatda iti checkpoint ken idi lumabas ti taxi a nagluganan ni Ayang-ang ket sadiay a sinukimatda ti kagawaanna a nagresulta iti panakakumpiskar ti maysa a basit a pakete ti maatap a shabu.
Naduktalan pay a positibo ti nasao a minero iti iligal a droga.
Iti agdama, sumangsangon ni Ayang-ang iti kaso a panaglabsing iti Comprehensive Dangerous Drugs Act of 2002.
