Agrekrekober itan ti maysa a minero kalpasan a tinagbat ti kinainumanna ti makinkanawan a paset ti ulo daytoy.
Napasamak ti insidente idiay Ampucao Itogon, Benguet itay laeng nabiit.
Iti report iti Itogon Municipal Police Station, naaddaan iti drinking session ti biktima ken ti suspect nu sadino, nagbanag nga adda ti saanda a nagkinnaawatan.
Kalpasan dayta, nagturong ti biktima iti silidna bayat a nagturong met ti suspect iti kusina tapno mangala iti badang wenno buneng.
Kasaruno dayta, nagturong ti suspect iti silid nga ayan ti biktima sakbayna a tinagbat ti ulo daytoy.
Dagus met a naireport ti nasao nga insidente ken dagus metlaeng a naiturong iti Baguio General Hospital ti biktima nu sadino, naipasidong daytoy iti operasyon.
Iti agdama,naipaiman iti kustodiya iti Municipal Social Welfare and Development ti agtawen iti sangapulo ket walo a suspect a naduktalan a maysa a Child in Conflict with the Law.
Kaso a Frustrated Homicide “Hacking” koma iti maipila iti suspect ngem narisuten daytoy babaen iti compromise agreement.//Bombo Noveh Organo
