BAGUIO CITY – Umap-apela ita ti maysa a miyembro ti La Trinidad Neighborhood watch kadagiti nagannak dagiti menor-de-edad a nangkamat ken nangbugbog iti maysa a mannalon sadiay La Trinidad Trading post area, Pico, La Trinidad Benguet idi May 24, 2022 ti parbangon.
Iti panakiuman ti Bombo Radyo Baguio kenni David Kidpo Jr., miyembro ti volunteer group a ‘neighborhood watch’ sadiay La Trinidad, kinunana a naimatanganna a mismo ti panangdangran ti grupo dagiti agtutubo iti maysa a lalaki.
Kinunana a nariing daytoy iti daydi nga oras gapu iti panagpaarayat ti biktima ken ti panagpupukkaw dagiti pito agingga iti walo nga agtutubo a mangkamkamat ken mangdangdangran iti nasao a lalaki.
Innayonna a dagiti nasao nga agtutubo ket lallaki ken babbae a mapatta-patta nga agtawen iti 14 agingga 17.
Sigun pay kenni Kidpo Jr. a sigud a reporter ti Bombo Radyo Baguio, saan a kinaassian dagiti agtutubo ti nasao a biktima agsipud ta intuloyda pay a binugbog daytoy idi sinublian ti lalaki ti nabatina a tsinelas iti kalsada.
Innayonna a nagsardeng laeng dagiti nasao nga agtutubo iti panangdangranda iti biktima ken nagtataray dagitoy idi pinukkawanna dagitoy.
Dinakamatna a dagus met a nagresponde dagiti pulis iti nasao a lugar apaman nga immawag daytoy ngem saandan a nadanon dagiti menor-de-edad.
Kinunana a nagsagrap ti biktima iti sugat iti ramayna ken limmukay pay dagiti makinsango a ngipenna gapu iti panakadangranna.
Maibasar iti panakitungtongna iti biktima, nammuanna nga agsapsapul laeng dagitoy ken ti kaduana iti restawran a pangananda idi nasalawda ti grupo dagiti agtutubo.
Innayonna a naisina kenkuana ti kaduana gapu iti panangkamat kadakuada dagiti nasao nga agtutubo.
Mainaig iti daytoy, inaklon ni Kidpo Jr. a nabayagen a mapalpaliiwda ti grupo dagiti agtutubo nga agis-istambay iti nasao a lugar ngem aglemlemmeng dagitoy no sumangsangbay dagiti agron-ronda a pulis.
Gapu iti daytoy, umap-apela daytoy kadagiti nagannak a rumbeng a disiplinaen ken siguraduenda nga agaw-awid dagitoy iti rabii.
Nagballaag daytoy a possible a maisagmak laeng iti dakdakes a pasamak dagiti agtutubo no baybay-an dagitoy dagiti nagannakda.
