Impasigurado ni sigud a two-time ONE Lightweight World Champion Eduard Folayang a nasaysayaat ti panagsagana ita ni Philippine National Wushu Champion Danny Kingad para iti umadanin a labanna kenni Adriano Moraes iti ONE 169: Atlanta idiay State Farm Arena Atlanta, Georgia inton November 8.
Iti panakaiuman ti Bombo Radyo kenni Folayang, imbinglayna nga ad-adda a naisaganaan ni Kingad ti pagpigsaan ti kalabanna a ground game nu idilig iti panagsaganana kadagiti napalpalabas a laban daytoy.
Innayon ni Folayang a saanen nga agbalin a dakkel a karit para kenni Kingad ti panagkissay iti kinadagsenna gapu ta bassit laeng ti nagdumaanda iti agdama a kadagsen daytoy nu idilig iti timbang a kasapulanna a maala para iti pasalip.
Malaksid iti dayta, saan met a nakapasar ti nasao nga Mixed Martial Arts (MMA) fighter iti nakaro a panakadunor rason a “fit to fight” daytoy.
Kabayatanna, kinuna ni Folayang a posible a maiyakar ti ONE 169: Atlanta a naituding koma a maangay idiay State Farm Arena in Atlanta, Georgia, USA idiay Lumpinee Boxing Stadium, Bangkok, Thailand, banag a favourable kenni Kingad gapu ta saanen daytoy a marigatan nga ag-adjust iti time zone ken saanen a mapressure pay iti panangisimpana iti visa daytoy.//Bombo Rob Dominguez
