Pimmusay ti maysa a motorcyle rider bayat a nadangran ti backrider daytoy kalpasan a naaksidente dagitoy sadiay Romulo Drive, Baguio City idi rabii.
Ti pimmusay ket agtawen iti 18-anyos, bayat a ti nadangran agtawen iti 17-anyos, agpada nga estudyante ken residente ti Itogon, Benguet.
Maibasar iti imbestigasyon, nagtaud ti motorsiklo iti direksyon ti Pacdal Circle ken paturong iti direksyon ti Bua Itogon Road.
Nupay kasta, naigalis ti motorsiklo gapu iti napigsa a panagbayakabak ti tudo rason a napukawan ti kontrol ti driver.
Gapu iti daytoy, naidungpar ti motorsiklo iti Toyota Innova wagon taxi nga adda iti sabali a linya ti kalsada a nagtaud met iti Mines View ken paturong iti Pacdal Circle.
Imanmaneho daytoy ti 59-anyos, taxi driver ken residente ti Santo Rosario, Campo Sioco, Baguio City.
Maatap a nagsardeng ti taxi driver idi nakitana ti motorsiklo a maidungpar iti luganna.
Naitaray iti Baguio General Hospital and Medical Center ti 17-anyos a biktima babaen iti panagresponde ti EMS-Baguio bayat a ti 18-anyos kas dead on the spot.
Nagsagrap iti nakaro a danyos ti lugan partikular iti sango ken iti bumper daytoy.
Naiyawid metten ti bangkay ti pimmusay a biktima iti pagtaenganna sadiay Itogon, Benguet.
Iti agdama ket nakaadmitar ti maysa kadagiti biktima iti ospital para iti pannakaagas daytoy.
