BAGUIO CITY – Ipampannakkel ita ti Team Lakay ti mural work ti maysa kadagiti miembro ti grupo.
Dinayaw ni Team Lakay founder ken head coach Mark Sangiao ti 13 by 24 feet mural work ni Harold Banario.
Inladawan met ni Eduard Folayang kas “mayat ken napintas” ti artwork ni Banario.
Inwagan met ni Kevin Belingon kas “super ganda” ti nasao a mural painting.
Kinuna met ni Geje Eustaquio a “gwapo” ti artwork ni Banario ken mangnamnama daytoy a maipalpas ni Harold ti mural work daytoy.
Makita iti artwork ti walo kadagiti sigud ken agdama a kampeon a miembro ti Team Lakay kas ken ni Folayang, Belingon, Stephen Loman, Crisanto Pitpitunge, Eustaquio, Honorio Banario ken ni Joshua Pacio ken ti coach dagitoy a ni Sangiao.
Sigun iti coach, asidegen a malpas ti mural ken makita a saan a perpekto ti linya, kulay ken surface daytoy ngem kinunana a ditoy a makita ti pudno a kinapintas ti artwork.
Sigun pay ken ni Sangiao, arigna daytoy ti mangiladawan iti Team Lakay a nagrugi iti nababa ngem ita ket makuna a successful wenno balligi.
Kinunana a pammaneknek daytoy a saan a lapped dagiti parikot wenno pagkapuyan tapno magun-od ti balligi.
Mangnamnama ni Sangiao nga agbalin nga inspirasion iti dadduma ti artwork ni Banario.
Impanamnama met ni Harold Banario nga ileppasna iti kabiitan a panawen ti mural work daytoy ken planona nga ikabil ti dadduma pay a rupa agraman ti rupana.
