BAGUIO CITY- Impannakel ti Baguio City Police office a simmayaat ti crime solution nga impatungpal dagitoy kagiddan ti panagbaba ti crime volume a nailista ita a tawen no idileg idi napalabas a tawen.
Maibasar iti datus, dumanon iti 106 a pakabuklan a crime volume idi 2020 manipud Enero agingga Pebrero bayat a 61 ita a tawen iti kapadana a bulan.
Manipud iti nasao a bilang, agpada a nailista ti 53 a kaso iti crime index ken non-index idi napalabas a tawen bayat a 25 ti nailista a crime index ken 36 a non-crime index ita a tawen.
Kangatoan a nailista nga krimen idi napalabas a tawen ket ti physical injury nga addaan iti 13 a kaso bayat a tallo nga kaso ita nga tawen.
Kangrunaan met a nailista a non-index crime idi napalabas a tawen ket unjust vexation nga addaan iti 13 a kaso ken bimmaba daytoy iti 11 ita a tawen.
Iti sidong met ti traffic incidents, kangatoan a nailista idi napalabas a tawen ket ti damage to property nga addaan iti 242 a kaso a bimmaba iti 56 ita a tawen.
Patien ti Baguio City Police Officen a resulta daytoy ti pandemya gaputa nalimitaran ti gunay dagiti suspek ken gapu metlaeng iti agtultuloy a pannakapapintas ken pannaka-improbar dagiti serbisyo nga ipapaay dagitoy iti publiko.
